Халықаралық білім беру корпорациясы (KazGASA) Қытай Халық Республикасының Білім министрлігі жанындағы Қытай ғылыми алмасу орталығы (Chinese Service Center for Scholarly Exchange, CSCSE) жариялаған Қазақстан жоғары оқу орындарының ресми тізіміне енгізілді. Бұл оқиға KazGASA-ның халықаралық білім беру кеңістігіндегі ұстанымын нығайтып, Қытаймен академиялық және ғылыми-білім беру ынтымақтастығын кеңейтуге қосымша мүмкіндіктер ашады.**
Халықаралық білім беру корпорациясының (KazGASA) CSCSE тізіліміне енгізілуі жоғары оқу орнының халықаралық қызметін дамытудағы маңызды кезең болып табылады. Қазақстандық білім беру ұйымдарының жарияланған тізімінде KazGASA «Қазақ бас сәулет-құрылыс академиясы» (哈萨克国立建筑学院) атауымен көрсетілген.
KazGASA-ның ҚХР Білім министрлігінің ресми ақпараттық тізілімінде болуы Қазақстан мен Қытай арасындағы стратегиялық әріптестік нығайып, білім беру, ғылым, инновациялар және жоғары білікті мамандар даярлау салаларына ерекше мән беріліп отырған кезеңде айрықша маңызға ие.
KazGASA үшін бұл оқиға сәулет, құрылыс, қала құрылысы, инженерлік технологиялар және қалалық ортаның орнықты дамуы салаларында Қытайдың жетекші университеттерімен ынтымақтастықтың жүйелі түрде кеңеюі тұрғысынан ерекше өзектілікке ие.
CSCSE тізіліміне енгізілу қазақстандық жоғары оқу орны туралы ақпараттың Қытайдың академиялық қауымдастығына қолжетімділігін арттыруға ықпал етіп, халықаралық білім беру бастамаларын одан әрі дамытуға қолайлы алғышарттар қалыптастырады. Атап айтқанда:
— студенттер мен оқытушылардың академиялық ұтқырлығын кеңейтуге;
— шетелдік талапкерлерді тартуға және Қазақстанның білім беру қызметтері экспортын нығайтуға;
— қос диплом бағдарламаларын қоса алғанда, бірлескен білім беру бағдарламаларын әзірлеуге және іске асыруға;
— сәулет, құрылыс, цифрлық жобалау және инженерлік технологиялар салаларындағы бірлескен ғылыми зерттеулерді дамытуға;
— ҚХР университеттерімен және ғылыми ұйымдарымен ұзақ мерзімді институционалдық әріптестікті нығайтуға мүмкіндік береді.
Халықаралық деңгейде танылудың жаңа кезеңі KazGASA-ның Қытай университеттерімен ынтымақтастығының жандануымен тұспа-тұс келді. 2026 жылғы қазанда Халықаралық білім беру корпорациясы Қытайдың Цзинань қаласында өткен «Бір белдеу, бір жол» бастамасы аясындағы сәулет-құрылыс университеттері консорциумының (BRAUIC) X халықаралық форумына қатысты.
Осылайша, KazGASA-ның халықаралық білім беру кеңістігіндегі қатысу аясын кеңейтуі қазақстандық сәулет-құрылыс білімін халықаралық академиялық ортаға интеграциялауға бағытталған нақты қадамдармен қатар жүзеге асырылуда.
Халықаралық білім беру корпорациясы (KazGASA) алдағы уақытта да академиялық әріптестік географиясын кеңейтуді, бірлескен білім беру және ғылыми-зерттеу жобаларын дамытуды, сондай-ақ қазақстандық сәулет-құрылыс білімінің халықаралық аренадағы беделін нығайтуды жалғастырады.
